صرت ألاحظ غضبي أبكر، وأقدر أوقف وأهدأ قبل ما أتكلم.
من يوم بديت الجلسات حسيت إني صرت أفهم نفسي أكثر وأنتبه للأشياء اللي تخليني أعصب على عيالي قبل كنت أشوف إن تصرفاتهم هي السبب ومع الوقت فهمت إن تعبي والضغط وتوقعاتي منهم لها دور في ردة فعلي ما صرت هادية طول الوقت بس صرت ألاحظ غضبي أبكر وأقدر في بعض المواقف أوقف وأهدا قبل ما أتكلم
أتخيل نفسي مع الاستمرار أكون أهدأ وأوضح في تعاملي مع عيالي وأقدر أحط لهم حدود بدون ما أوصل للصراخ كل مرة وأتمنى يصير بيننا مجال أكبر للكلام ويقدرون يعبرون لي عن مشاعرهم وأكون أنا بعد قادرة أهتم بنفسي و اتجاوب معاهم بهدوء
خلال الجلسات كنت أحس إن عندي مساحة أتكلم فيها عن المواقف اللي تضايقني بدون ما أخاف من الحكم علي بعض المواضيع كانت تخليني أواجه أشياء في نفسي ما كنت منتبهة لها وأوقات كنت أطلع مرتاحة وأوقات أطلع أفكر في اللي تكلمنا عنه وأحاول أطبقه في البيت والتطبيق ما كان سهل في كل مرة
أكثر شي تغير هو نظرتي لتصرفات عيالي قبل كنت أفسر بعض تصرفاتهم على إنها عناد أو إنهم ما يسمعون كلامي والحين صرت أحاول أفهم شو ورا التصرف وهل اللي أطلبه مناسب لعمرهم. وصرت أنتبه لاحتياجي للراحة قبل ما يتراكم الضغط علي وإذا عصبت أحاول أرجع أتكلم معاهم وأعتذر عن أسلوبي وأوضح المطلوب بهدوء بدل ما أظل احاسب نفسي في نهاية اليوم وارجع اكرر نفس الموضوع في اليوم اللي بعده . موضوع التنفس العميق مع العدّ قبل ما اوصل لمرحلة الغضب وايد ساعدني.
قبل ما اتفاعل مع طفلي المعصب و المتضايق كنت اسوي connect before correct التواصل قبل التصحيح وايد ساعدني اني ارتب ردة فعلي و ردي يمنحني الوقت اني اعرف شو برد عليه او شو الرد اللي بيهدي الموقف مش يزيده انفعال.
قمت اقض وقت خاص مع بنتي الكبيره مثل ما نصحتيني و صرت اشوف نتيجة طيبه لانها كان في الحاح كثره اسئلة ما كنت اعرف كيف اتعامل معها لكن بعد ما منحتها وقت خاص حقي انا وياها مع بعضنا شفت نتيجة حلوه صار الالحاح اقل و صارت تعرف انه خلال اليوم بيكون لنا وقتنا الخاص حتى لو خمس دقايق او عشر دقايق بييننا.
عندي ابني الثاني لاحظت فرق مع تكرار كلمة (انا اسمعك) كان يصارخ حتى ينسمع بس لما قمت انظم وقت كلام كل واحد من العيال واعيد جملة (انا اسمعك) اشوفه قام يتكلم بهدوء اكثر بدون ما يركز هل انا اسمعه او لا و بدون ما يوصل فكرته بصوت عالي
شكرا لج على هالجلسات وعلى تفهمج واستماعج لي، ساعدتيني أفهم نفسي و اسلوب تربيتي وأشوف بعض المواقف مع عيالي بطريقة مختلفة للحين أتعلم وأغلط بس صرت أوعى بردود فعلي وأعرف أرجع وأصلح الموقف